सुध्रिएन लुम्बिनी प्रादेशिक अस्पतालको सेवा,रिपोर्ट आउन दिनै बित्ने,बिरामीलाई झनै सास्ती

बुटवल । लुम्बिनी प्रदेशकै प्रमुख सरकारी स्वास्थ्य संस्था लुम्बिनी प्रादेशिक अस्पतालमा उपचारका लागि आउने बिरामी तथा सेवाग्राहीले एकै दिनमा सबै सेवा पाउन कठिन हुने गरेको गुनासो बढ्दै गएको छ। विशेष गरी पहिलो पटक अस्पताल पुग्ने सेवाग्राहीलाई अस्पतालको कार्यप्रणाली बुझ्ननै निकै समस्या हुने गरेको देखिन्छ।

अस्पताल परिसरभित्र ओपिडी टिकट काट्ने, डाक्टर देखाउने, परीक्षण गराउने तथा रिपोर्ट बुझ्ने जस्ता कामका लागि छुट्टाछुट्टै भवन र कक्षमा पुग्नुपर्ने भएकाले सेवाग्राही दिनभरि लाइनमा बस्न बाध्य हुने गरेका छन्। अस्पतालका विभिन्न सेवा कक्ष अगाडि बिहानैदेखि लामा–लामा लाइन देखिन्छन्, जसले गर्दा धेरै बिरामीले एकै दिनमा सम्पूर्ण सेवा लिन नसक्ने अवस्था रहेको छ। अस्पतालमा सेवाग्राहीलाई मार्गदर्शन गर्न सहयोग केन्द्र स्थापना गरिएको भए पनि यसको व्यवस्थापन प्रभावकारी नभएको गुनासो सेवाग्राहीबाट सुनिन्छ। नयाँ बिरामीलाई कुन विभागमा जानुपर्ने, टिकट कहाँ काट्ने, परीक्षण कहाँ गर्ने भन्ने स्पष्ट जानकारी नपाउँदा उनीहरू एक भवनदेखि अर्को भवनसम्म धाइरहनुपर्ने अवस्था देखिन्छ।

अस्पताल प्रदेशकै ठूलो सरकारी अस्पताल भएकाले लुम्बिनी प्रदेशका विभिन्न जिल्लाबाट बिरामी उपचारका लागि आउने गर्छन्। पाल्पा, गुल्मी, अर्घाखाँची, कपिलवस्तु, नवलपरासी, रोल्पा, रुकुम लगायत जिल्लाका बिरामी उपचारका लागि यही अस्पतालमा आउने गरेको तथ्यांकले देखाउँछ।  बिरामीको चाप अत्यधिक हुँदा प्रयोगशाला परीक्षण तथा अन्य स्वास्थ्य परीक्षणको रिपोर्ट आउन पनि समय लाग्ने गरेको सेवाग्राहीको अनुभव छ। कतिपय अवस्थामा बिहान गरिएको परीक्षणको रिपोर्ट बेलुकासम्म मात्र उपलब्ध हुने वा अर्को दिन लिन आउनुपर्ने अवस्था रहने गरेको उनीहरू बताउँछन्।

अस्पतालको सेवा विस्तार तथा व्यवस्थापन सुधार गर्न नयाँ भवन निर्माणको प्रक्रिया अघि बढाइएको छ। तर उक्त भवन कहिले सम्पन्न भएर पूर्ण रूपमा सञ्चालनमा आउने भन्ने विषय अझै स्पष्ट भइसकेको छैन। नयाँ भवन सञ्चालनमा आएपछि सेवा सहज हुने अपेक्षा गरिएको भए पनि हालसम्म सेवाग्राहीले प्रत्यक्ष राहत भने महसुस गर्न सकेका छैनन्। यद्यपि न्यूनतम सेवा मापदण्डको मूल्याङ्कनमा देशका सरकारी अस्पतालमध्ये उत्कृष्ट अस्पतालको रूपमा पनि यस अस्पतालले स्थान हासिल गरिसकेको छ तर सेवाग्राहीको बढ्दो चाप, सीमित जनशक्ति तथा व्यवस्थापनको चुनौतीका कारण दैनिक सेवा प्रवाह अझै सहज बनाउनुपर्ने आवश्यकता देखिएको छ।

स्थानीय सेवाग्राहीहरूका अनुसार अस्पतालले बिरामीको चापअनुसार सेवा प्रणाली सुधार, स्पष्ट सूचना प्रणाली र प्रभावकारी व्यवस्थापन गर्न सके मात्र सर्वसाधारणले सहज रूपमा स्वास्थ्य सेवा पाउने विश्वास गरिएको छ।