लुम्बिनी फ्रिडम मिडिया प्रा.लि द्वारा संचालित
कुञ्जलापुर। तिलोत्तमा नगरपालिकामा ७१ जना सिकलसेल एनिमियाका बिरामी रहेको नगरपालिकाको स्वास्थ्य शाखाले जानकारी गराएको छ । स्वास्थ्य शाखाले बुधबार आयोजना गरेको सिकलसेल एनिमिया तथा थालेसेमिया रोग सम्बन्धी सचेतना अभिमुखिकरण कार्यक्रममा यस्तो जानकारी गराइएको हो । थारु समुदायमा बढी देखिने सिकलसेल एनिमियाको परीक्षण सरकारी अस्पतालहरुमा निःशुल्क हुने गर्दछ ।
रुपन्देहीमा रहेका लुम्बिनी प्रादेशिक अस्पताल बुटवल, भीम अस्पताल भैरहवा र जनस्वास्थ्य प्रयोगशाला, बुटवलमा सिकलसेल एनिमियाको निःशुल्क परीक्षण हुने स्वास्थ्य शाखा प्रमुख ज्ञानप्रसाद पौडेलले बताउनुभयो । उहाँले जोखिममा रहेका व्यक्तिहरुलाई समयमैं सिकलसेल एनिमियाको परीक्षण गर्न आग्रह समेत गर्नुभयो ।
अभिमुखीकरण कार्यक्रममा स्वास्थ्य कार्यलयका बरिष्ठ ल्याब प्राबिधिक खिमलाल पाण्डेले सिकलसेल एनिमियाका बिषयमा अझैं पनि जानकारी नहुँदा ग्रामीण समुदायका बिरामीहरु उपचारको पहुँचमा आउन नसकेको बताउनुभयो । उहाँले पहिचान भएका बिरामीहरुलाई स्वास्थ्य बीमामा आवद्ध गराएर निःशुल्क उपचारको व्यवस्था मिलाइएको पनि जानकारी दिनुभयो । उहाँले श्रीमान् श्रीमती दुवै सिकलसेलका बिरामी रोगी भए उनीहरुबाट जन्मिने बच्चा पनि त्यसबाट प्रभावित हुने भएकोले विवाह गर्दा उच्च यान दिइनुपर्ने बताउनुभयो । उहाँले नेपालमा ३ लाख सिकलसेलका बिरामी रहेको जानकारी समेत गराउनुभयो ।
तिलोत्तमा नगरपालिकामा सबैभन्दा बढी वडा नं. १७ मा सिकलसेल एनिमियाका बिरामीहरु फेला परेको स्वास्थ्य शाखाकी नर्सिङ्ग अधिकृत लक्ष्मी आचार्यले जानकारी दिनुभयो । सिकलसेल एनिमियाको उपचारको लागि नेपाल सरकारले १ लाख, प्रदेश सरकारले २ लाख र नियमित औषधीका लागि मासिक ५ हजार रुपैंयाँ बिरामीलाई उपलब्ध गराउने व्यवस्था छ ।
कमेन्ट गर्नुहोस्