तिलोत्तमाका १५ जना नगर प्रहरी जवान दिक्षित,सशस्त्र प्रहरीबलबाट लिए तालिम

तिलोत्तमा,माघ ६।तिलोत्तमा तिलोत्तमा नगरपालिकाले आह्वान गरेको  नगर प्रहरी भर्नाबाट छनोट भएका १५ जना नगर प्रहरीलार्ई आईतवार दिक्षित गरिएको छ । सशस्त्र प्रहरी बल नम्बर २७ गण हेडक्वाटर रुपन्देहीमा विगत एक महिनादेखि  आधारभूत तालिम लिएका नगर प्रहरीलाई तालिमको समापनसँगै दिक्षित गरिएको हो ।

तिलोत्तमा नगरपालिकाका नगर प्रमुख रामकृष्ण खांण, उप प्रमुख जगेश्वरी देवि चौधरी, सहायक प्रमुख जिल्ला अधिकारी अध्योध्या प्रसाद  भण्डारी र गणका गर्णपती आनन्द बहादुर थापा तथा नगरपालिकाका प्रमुख प्रशासकीय अधिकृत नारायण अर्यालले नगर प्रहरीलाई सामुहिक रुपमा दिक्षित गरेका हुन् । सोही अवसरमा नगर प्रमुख रामकृष्ण खांणले  तालिम सकाएर दिक्षित भएका नगर प्रहरीहरुलाई स्वागत गदै नगरवासीलाई सुरक्षाको प्रत्याभूती दिलाउनका लागि नै नगर प्रहरीको संख्या बढाएको बताए । उनले राज्यको दायित्व पहिला गांस बांस र कपास रहेकोमा त्यसमा अहिले  शिक्षा, स्वास्थ्य र  सुरक्षा थपिएकोले  स्थानीय तहले पनि नगरवासीको सुरक्षाको जिम्मा लिनु पर्ने भएकाले नगर प्रहरीको जिम्मेवारी  निकै प्रभावकारी हुने धारणा राखे । 

नगर उप प्रमुख जगेश्वरी देवि चौधरीले तालिमका दौरानमा सिकेका विषयलाई  कार्यस्थलमा हुबहु प्रयोग गर्दै नगर र सार्वजनिक सम्पत्तिको सुरक्षासँगै आमनागरिकको सेवामा  खट्नेमा विश्वास व्यक्त गरिन । रुपन्देहीका सहायक प्रमुख जिल्ला अधिकारी अध्योध्या प्रसाद  भण्डारीले  तालिममा सिकेका विषयलाई व्यवहारमा कार्यान्वयन गर्न सुझाव दिए । गणका गणपती आनन्द बहादुर थापाको अध्यक्षतामा दीक्षान्त कार्यक्रम गरिएको थियो ।