बलात्कारको आरोपमा एक युवकलाई ११ वर्ष कैद

२०७८ माघ १९, तिलोत्तमा सिटी। १७ वर्षिया युवतीलाई बलात्कार गरी गर्भपतन गराएको आरोपना  त्रिवेणी गाउँपालिका– १, सल्यानका २५ वर्षीय जनकबहादुर पुनलाई जिल्ला अदालत म्याग्दीले ११ वर्ष कैद फैसला सुनाएको छ । म्याग्दीका जिल्ला न्यायाधीश तेजनारायण पौडेलको इजलासले १७ वर्षीया युवतीलाई बलात्कार गरेर जबरजस्ती गर्भपतन गराएको भन्दै बलात्कार कसुरमा १० वर्ष र गर्भपतन गराएको कसुरमा थप १ वर्ष गरी ११ वर्ष कैद फैसला गरेको हो ।

अदालतले आरोपित जनकलाई ३० हजार जरिवाना र ३० हजार क्षतीपुर्ति भराउने आदेश गरेको जिल्ला अदालत म्याग्दीका श्रेस्तेदार तेजप्रसाद पौडेलले बताउनुभयो । २०७६ साउन २९ गते बलात्कार गरी माघ २ गते पोखरामा लगेर जबरजस्ती गर्भपतन गराएको भन्दै पीडित १७ वर्षीया युवतीले माघ ७ गते जिल्ला प्रहरी कार्यालय म्याग्दीमा उजुरी दिएकी थिइन् ।

उजुरीका आधारमा त्रिवेणी गाउँपालिका– १, का २५ वर्षीय जनकबहादुर पुनलाई प्रहरीले उजुरी दिएकै दिन गिरफ्तार गरेको थियो । नवलपरासी रामग्राम– ४, घर भई पोखरा महानगरपालिका– ८, स्थित उपचार स्वास्थ्य क्लिनीक सञ्चालन गरिरहेका ५१ वर्षीय डाक्टर राजेन्द्रकुमार चौधरी र गर्भपतन गराउँदा साक्षी बस्ने बालिकाको ६६ वर्षीय बुबालाई जिल्ला अदालत म्याग्दीले गत पुस २६ गते १ वर्ष कैद र ३० हजार रुपियाँ जरिवाना तिराउने फैसला गरेको थियो ।