लुम्बिनी फ्रिडम मिडिया प्रा.लि द्वारा संचालित
२०७८ पुस ६, तिलोत्तमा सिटी।
मेरा प्यारा युवक कलिलो छैन तिम्रो शरीर ।
अल्छी लागी ढिसमिस हुने हैन तिम्रो उमेर
फाली लाछीपन अब तिमी चित्तबृत्ती सुधार
मेरा प्यारा युवक ! बलिया, देशका कर्णधार ।।
छैनौ साना अब तिमि भयौ तन्नेरी हे किशोर ।
तिम्रा सारा अवयाव भए जोशिला हे किशोर ।।
आँखा चिम्ली नबन लहडी चर्म चक्षू उघार ।
मेरा प्यारा युवक बलिया देशका कर्णधार ।।
तिम्रो सानो मगज अब ता छैन है नौजवान ।
तीखो बुद्धी हुनु समयको माग हो नौजवान ।।
फालीदेऊ कुटिल मनका कल्पना हौ उदार ।
मेरा प्यारा युवक बलिया देशका कर्णधार ।।
तिम्रै आशा सकल दुनियाँ गर्छ, गर्ला भनेर ।
बाटो हेर्छन् नवकिरणको ज्योति छर्ला भनेर ।।
बाटो छोढी कुलततिरको भूल गल्ती सुधार ।
मेरा प्यारा युवक बलिया देशका कर्णधार ।।
छातीमाथी भुवनभरको भार धानेर लेऊ ।
साथीसाथी मिलि सुजनकै साथ छानेर लेऊ ।।
बाटो त्यागी कुलततिरको बानि तिम्ले सुधार ।।
मेरा प्यारा युवक बलिया देशका कर्णधार ।।
भक्ती थापा बनन रिपुको तोप फर्काइदेऊ ।
हाम्रा योद्धा अमरसिँह भै लोक थर्काइदेऊ
गर्जीगर्जी रिपुसँग सधै लड्न होऊ तयार ।
मेरा प्यारा युवक बलिया देशका कर्णधार ।।
छैनन् धन्दा सरल रितका काम क्यै पाइँदैन ।
तिम्रा हाम्रा सब दिन यसै वित्दछन् भै विकम्मा ।।
तोडीदेऊ गलत रिति यो कानुनी रूप फेर ।
मेरा प्यारा युवक बलिया देशका कर्णधार ।।
हे नेपाली नवयुवक हो ! विन्ति यो मानिलेऊ ।
आँखा खोली मयल मनको झट्ट मिल्काइदेऊ ।।
चाँडो चाँडो गर नवयुवा देशलाई सुधार ।
मेरा प्यारा युवक बलिया देशका कर्णधार।।
हाम्रा अग्ला हिमशिखर भै देश चँम्काइदेऊ ।
द्युसो राती रवि शशि बनी ज्योति झल्काइदेऊ ।।
तारा जस्तै चमचम गरी तोडिद्यौ अन्धकार ।
मेरा प्यारा युवक बलिया देशका कर्णधार।।
कमेन्ट गर्नुहोस्