तिनाउ करिडोरमा अवैध उत्खनन: बानियाँ जेभीलाई वडा कार्यालयले रोक्यो, कानुनी प्रमाण पेस गर्न निर्देशन

​तिलोत्तमा ।तिलोत्तमा नगरपालिका वडा नं. ४ स्थित तिनाउ नदी क्षेत्रमा मापदण्ड विपरीत अवैध रूपमा ढुंगा उत्खनन तथा संकलन गरेपछि स्थानीय वडा कार्यालयले ‘बानियाँ जे भि कन्स्ट्रक्सन’ लाई काम रोक्न निर्देशन दिएको छ। ​तिनाउ दानव करिडोर निर्माण आयोजनाको काम गरिरहेको उक्त निर्माण कम्पनीले पटक-पटकको चेतावनीलाई अटेरी गर्दै अवैध रूपमा खाल्डो खन्ने, ढुंगा चाल्ने र अन्यत्र ओसारपसार गर्ने कार्य जारी राखेपछि वडा कार्यालयले पत्र काट्दै निर्माणजन्य सम्पूर्ण गतिविधिमा रोक लगाएको हो।

​वडा अध्यक्ष हरि बहादुर क्षेत्रीद्वारा हस्ताक्षरित पत्र अनुसार, कम्पनीलाई यसअघि पनि सिमानगर हाट बजार क्षेत्र तथा तिनाउ खोला नजिकै मापदण्ड विपरीत खनिएका खाल्डा र नदीजन्य पदार्थको दुरुपयोग रोक्न निर्देशन दिइएको थियो। तर, निर्माण कम्पनीले स्थान परिवर्तन गर्दै पुनः वडा नं. ४ देखि पश्चिम-दक्षिण तिनाउ खोला किनारमा एक्साभेटर प्रयोग गरी गैरकानुनी रूपमा ढुंगा संकलन र निकासी गर्न थालेपछि वडा कार्यालय कडा रूपमा प्रस्तुत भएको हो। ​वडा कार्यालयले ४ नं. वडा क्षेत्रभित्र मेसिन प्रयोग गरी वा नगरी गरिने कुनै पनि किसिमका निर्माणजन्य गतिविधि तत्काल रोक्न र ढुंगा नउठाउन स्पष्ट पारेको छ।

​साथै, यदि उक्त उत्खनन कार्य नियमसम्मत र कानुनी प्रक्रिया अनुसार भएको भए आयोजना हेर्ने सडकका प्राविधिक, आयोजनाको आधिकारिक लिखित पत्र र नदी क्षेत्रको ढुंगा, गिट्टी तथा माटो प्रयोग गर्न पाउने स्पष्ट कार्यादेश (Work Order) वडा कार्यालयमा पेस गर्न कम्पनीलाई भनिएको छ। कानुनी प्रमाण र स्पष्ट कार्यादेश पेस नगरिएसम्म काम नगर्न र आदेशको अवज्ञा गरिएमा कानुन अनुसार कडा कारबाही गरिने चेतावनी समेत पत्रमार्फत दिइएको छ।