मनिशको ह्याट्रिकमा झरना बिजयी, चौथो समपूर्ण कपको उद्धघाटन,बुधबार सुनवल भर्सेस फर्साटिकर

सुपौली। नवयुवा खेलकुद तथा साँस्कृतिक क्लव ठुटीपीपललाई ० का विरुद्ध ४ गोलले पराजित गर्दै झरना स्पोर्ट्स क्लव कुन्जलापुर चौथो समपुर्ण कप खुला फुटबल प्रतियोगिताको क्वाटरफाइनलमा प्रवेश गरेको छ । समपुर्ण युवा क्लब, तिलोत्तमा–१४ सुपौलीको आयोजनामा मंगलबार भएको उद्धघाटन खेलमा मनिष थारुको ह्याट्रिक र रोहित सुनारको १ गोलको मद्दतमा झरनाले एनवाईसी ठुटिपीपललाई ० का विरुद्ध ४ गोलको फराकिलो अन्तरमा पराजित गरेको हो । शुरुबाटै खेलमा हावी देखिएको झरनाले खेलको तेस्रो, अठारौँ, मध्यान्तरको ठिक अघि र मध्यान्तर लगत्तै एकपछि अर्को गोल गरेको थियो ।

खेलमा ह्याट्रिक गरेका झरनाका मनिष थारुले म्यान अफ दी म्याच हुदै नगद रु ३ हजार सहित ट्रफी हात पारे । प्रतियोगितामा बुधबार दोस्रो दिनको खेल सुनवल फुटवल क्लव सुनवल तथा फर्साटिकर युवा क्लव, फर्साटिकर बीच हुने प्रचार प्रसार संयोजक तथा क्लबका सचिव रवि अर्यालले बताउनुभयो । यसअघि मंगलबार नै आयोजित उद्धघाटन सत्रमा बोल्दै कार्यक्रमका प्रमुख अतिथि तथा तिलोत्तमा नगरपालिकाका मेयर रामकृष्ण खाँडले तिलोत्तमा कै गौरवको रुपमा रहेको चौथो समपुर्ण कप खुला फुटबल प्रतियोगिताको सफलताको कामना गर्नुभयो ।

वहाँले स्थानीय स्तर आयोजना हुने यस्ता प्रतियोगिताबाट नयाँ खेलाडीको प्रतिभा प्रस्फुटन हुनुका साथै समग्र फुटवलको विकाशमा समेत मद्दत पुग्ने बताउनुभयो । क्लवका उपाध्यक्ष नारायणी बोहोरा पुनको अध्यक्षता रहेको उद्धघाटन कार्यक्रममा नगर खेलकुद विकाश समिति संयोजक लोक पुन, तिलोत्तमा वडा न १४ का वडाअध्यक्ष आश्विन पौडेल, मुख्य प्रायोजक हिराकुमारी पुन, सिद्धार्थ इट्टा उद्योगका प्रवन्ध निर्देशक इश्वरी बस्ती, नेपाली १९ बर्ष मुनिको महिला फूटबल टिमका मुख्य कोच यम गुरुङ लगायतको सहभागिता रहेको थियो ।

क्लवका सल्लाहकार निलप्रसाद पुनले स्वागत मन्तब्य दिनुभएको कार्यक्रमको सन्चालन प्रचार प्रसार संयोजक तथा क्लबका सचिव रवि अर्यालले गर्नुभएको थियो । स्व. बुवा लाल बहादुर पुन तथा स्व छोरा राजकुमार पुनको स्मृतिमा मंगलबारबाट शुरु भएको चौथो समपुर्ण कप खुला फुटबल प्रतियोगिता मंसीर ६ गतेसम्म चल्नेछ । सुपौली स्थित समपुर्ण क्लवको आफनै खेलमैदानमा शुरु भएको प्रतियोगितामा कुल १२ टोली आमनेसामने हुदैछन । प्रतियोगिताको विजेताले उपाधिसहित नगद रु ३ लाख ३ हजार ३ सय ३३ रुपैया हात पार्नेछ भने उपविजेताले १ लाख ५१ हजार १ सय ५१ रुपैया प्राप्त गर्ने क्लवका अध्यक्ष अविर पुन पाइजाले जानकारी दिनुभयो ।

त्यस्तै विधागततर्फ सर्वोत्कृष्ट खेलाडीले १५ हजार, उत्कृष्ट गोलकिपर, सर्वाधिक गाृेलकर्ता र उदयीमान खेलाडीले नगद रु ८ हजार ५०० सय का दरले पाउनेछन् भने खेल अवधिभर हरेक दिनको म्यान अफ द म्याचले नगद रु ३ हजार सहित ट्रफी पाउने क्लवका कोषाध्यक्ष विजय थापाले जानकारी दिनुभयो । खेल हेर्नका लागि यसपटक पहिलो चरणका लागी रु ५० रुपैयाँ टिकट शुल्क तय गरिएको छ भने दोस्रो चरण, सेमीफाइनल र फाइनलका लागी रु १०० तय गरिएको क्लवका संस्थापक अध्यक्ष अशोक पुनले बताउनुभयो ।  यसैगरि जेष्ठ नागरिक, बालबालिका, महिला र फरक क्षमता भएका दर्शकहरुलाई प्रवेश निशुल्क गरिएको खेल संयोजक ढक बहादुर पुनले जानकारी दिनुभयो ।