गोर्खा ब्वाईजलाई हराउदै पुर्व विजेता नवयुवा लिस्नु कपको क्वाटरफाइनलमा

तिलोत्तमा, भाद्र २४ गते २०८१। सफा गोल अन्तरले पूर्व विजेता नवयुवा खेलकुद तथा साँस्कृतिक परिवार, ठुटिपिपल तिलोत्तमाको कोटिहवामा जारी स्व. कमलराज पाठक स्मृति २२औं लिस्नु कप खुला नकआउट फुटबल प्रतियोगिताको क्वाटरफाइनलमा प्रवेश गरेको छ । सोमबार पशुपति माविको प्राङ्गण ( खेलमैदान) मा सम्पन्न तेस्रो प्रिक्वाटरफाइनलमा नवयुवाले गोर्खा ब्वाईज स्पोर्टस क्लब, बुटवललाई शून्यका विरुद्ध २ गोलले हराउँदै क्वाटरफाइनलमा आफ्नो स्थान सुरक्षित गरेको हो ।

नवयुवाको जितमा कृपा चौधरी र दिपेश गुरुङले गोल गरे । दुवै तर्फ चर्चित राष्ट्रियस्तरका खेलाडीहरु भए तापनि नतिजा नवयुवाले आफ्नो पक्षमा पार्यो । खेलमा नवयुवा कै दिपेश गुरुङ म्यान अफ द म्याच घोषित भए।प्रतियोगिता अन्तर्गत भदौ २५ गते मंगलबारको अन्तिम प्रिक्वाटरफाइनल खेल आयोजक लिस्नु युवा क्लब, कोटिहवा र झरना स्पोर्टस क्लब, कुञ्जलापुरबीच हुने खेल संयोजक कृष्ण गुरुङले जानकारी दिए ।

लिस्नु युवा क्लब, तिलोत्तमा–१५, कोटिहवाको आयोजनामा जारी प्रतियोगिताको विजेताले उपाधिसहित नगद ३ लाख २५ हजार हात पार्नेछ भने उपविजेताले १ लाख ६५ हजार प्राप्त गर्नेछ । कुल १२ टोलीहरु सहभागि प्रतियोगिताको फाइनल खेल असोज ३ गतेका दिन हुनेछ ।