एउटा व्यक्तिको क्यान्सर को कथा जस्ताको तस्तै

जुन दिन मलाई क्यान्सर भएको थाहा भयो तब मेरो मनस्थिति पूर्ण रुपमा बिग्रियो। मैले अब जीवनमा केही गर्न सक्दिन जस्तो भान भयो। कुनै पनि कुरामा आनन्द आउन छोड्यो। खुसी र सुख भन्ने कुरा जीवनमा अब कहिल्यै आउँदैन जस्तो लाग्यो।समय सँगै उपचार हुँदै गयो र नियमित औषधि खानुपर्ने भयो त्यसपछि मलाई ठिक हुँदै गयो। मैले बिस्तारै फेरि मेरो जीवनमा सुख र खुसी फर्किएको महसुस गर्न थाले। तर पनि जीवन क्यान्सर नलाग्दाजस्तो कहिल्यै हुन सकेन सधैं केही कमी भएजस्तो महसुस हुन्थ्यो। जति नै कमी भएपनि जिन्दगी त अगाडि बढाउनै पर्दो रहेछ। 

बिस्तारै म फेरि आफ्नो काममा फर्किन थाले। नियमित औषधि सेवनसँगै म आफ्नो काम गर्दै थिए तर पनि मलाई लाग्थ्यो ममा केही कमी छ। त्यसैले गर्दा म पूर्णरुपमा खुसी महसुस गर्न सकिन। फेरि केही समयपछि मलाई इन्फेक्सन भयो र म हस्पिटल भर्ना हुन पर्यो। १५ दिनको हस्पिटल बसाईपछि म घर आए र रेस्ट गर्न थाले। फेरि मेरो काममा बाधा आयो र मेरो मनस्थिति अब काम बाट पर भयो। घर आएको एक हप्तापछि फेरि ज्वरो आउन थाल्यो र म हस्पिटल गएँ। त्यसपछि डाक्टर साहबले सिटी स्क्यान गर्न भन्नुभयो र मेरो किड्नी भन्दा माथिपट्टि मासु पलाए जस्तो कुरा गर्नुभयो। अनि त्यस भागको बायोप्सी गर्न भन्नुभयो र मैले बायोप्सी गरे र मलाई पत्ता लाग्यो कि मलाई एड्रिनल ग्ल्यान्डको टिभी भएको रहेछ। जुन दिन मैले त्यो खबर सुने म साह्रै खुसी भए किनकि डाक्टर साहबले ट्युमर जस्तो छ भन्नुभएको थियो तर टिभी रहेछ। 

पछि डाक्टर साहेबलाई देखाउँदा डाक्टर साहब  खुसी हुनुभयो,आफन्तजनहरू पनि खुसी हुनुभयो। टिभीको औषधि नौ महिना जति  खानुपर्ने कुरा डाक्टर साहबले गर्नु भयो। अहिले नियमित म टिभीको औषधि सँगै क्यान्सरको औषधि खाँदै छु।

क्यान्सर भएदेखि मैले बुझेको र मनन गरेको कुरा धेरै छन्।

१. जीवन अमूल्य छ यसको मूल्य हामीले छिट्टै बुझ्नुपर्छ। 

२. जीवनमा मायाजस्तो अरु कुरा केही छैन त्यसैले सबैलाई   मायागरौं , तपाईँको मायाले अरुको जीवनमा ठूलो  सहयोग गर्दछ। 

३. आफ्नो स्वास्थ्यको लागि नियमित ख्याल राख्नुपर्छ।

४. तपाईँलाई सहयोग चाहिन्छ त्यसैले अरुको साथ र सहयोग लिनुहोस्।

५. तपाईँको बाबुआमा श्रीमती र आफन्तहरू जस्तो सहयोगी अरु कोही पनि हुँदैनन्। 

६. अरुलाई दुःख परेको बेला सहयोग गर्नुपर्दछ। 

७. आफू कमजोर भएको बेला भगवानसँग जोडिनु पर्दछ र जीवनमा राम्रा मान्छेको संगत र राम्रो किताब पढ्नु पर्दछ। 

९. क्यान्सर हामीले सोचेजस्तो खतरा पनि छैन नियमित उपचार ,औषधि सेवन , लाइफस्टाइल सुधार ,राम्रो खानपिन र नियमित व्यायाम ले धेरै मद्दत गर्दछ। 

१०. सबैभन्दा ठूलो कुरा आफूलाई ठिक नलागेको कुरा गर्नु हुँदैन र नकारात्मक सोच हटाउनु पर्दछ।