तिलोत्तमाका विद्यार्थीका लागि च्यालेन्ज फण्ड तथा सोधपत्र लेखनमा आर्थिक सहयोग कार्यक्रम

तिलोत्तमा। तिलोत्तमा नगरपालीकाले सामुदायिक विद्यालय तथा क्याम्पसका विद्यार्थीका लागि च्यालेन्ज फण्ड तथा सोधपत्र लेखनमा आर्थिक सहयोग कार्यक्रम संचालन गर्ने भएको छ । विद्यार्थीहरुको सामाजिक, सांस्कृतिक, प्राविधिक क्षेत्रमा नविनतम कार्यक्रम एवम् नेतृत्व विकासका लागि आर्थिक वर्ष २०८२/८३ को वार्षिक कार्यक्रम अनुसार च्यालेन्ज फण्ड कार्यक्रम संचालन गर्न प्रति समुह अधिकतम १० हजार उपलब्ध गराइने सामाजिक विकास समिति संयोजक रवी सेन्चुरीले जानकारी दिए ।

च्यालेन्ज फण्डमा सहभागि हुनका लागि विज्ञान प्रविधि, जनचेतना, अभिमुखिकरण, आयआर्जन तथा साहित्य कला सम्बन्धी विषयमा विद्यार्थीले सहभागिता जनाउन सक्नेछन्। एक विद्यालय वा क्याम्पसबाट ३ देखि ७ जना विद्यार्थी संलग्न भई फण्ड अन्तर्गतको कार्यक्रम गर्न पाउने उनले बताए ।त्यस्तै, सोधपत्र लेखनका लागि प्रति विद्यार्थी १० हजार रुपैयां छुट्याइएको सेन्चुरीले जनाए । नगरभित्र रहेका विद्यार्थीले अध्ययन, अनुसन्धान मार्फत सामाजिक, आर्थिक, सांस्कृतिक, राजनैतिक र प्राविधिक विकासका लागि यो आर्थिक वर्षमा १० जना विद्यार्थीले पाउनेगरी कार्यक्रम संचालन गरिने शिक्षा शाखा प्रमुख गंगाराम आचार्यले बताए ।

उनले नगरभित्रका स्थायी बासिन्दा रहेका विद्यार्थी  स्नातक तथा स्नातकोत्तर तहमा अन्तिम वर्ष वा अन्तिम सेमेष्टरमा नियमित रुपमा पढ्दै गरेको हुनुपर्ने उनले जनाए । सोधपत्र लेखनका लागि विज्ञान तथा प्राविधिक क्षेत्र बाहेक अन्य विषयको अध्ययन क्षेत्र तिलोत्तमा नगरपालीका केन्द्रित हुनुपर्ने आचार्यले बताए । उनका अनुसार ०८२/८३ मा उक्त कार्यक्रमका लागि ३ लाख बजेट विनियोजन गरिएको छ ।